ADPU-nun Quba filialında birinci tədris ili tələbələri ilə əlamətdar görüş keçirilib

07.10.2026
ADPU-nun Quba filialında birinci tədris ili tələbələri ilə əlamətdar görüş keçirilib

Azərbaycan Dövlət Pedaqoji Universitetinin (ADPU) Quba filialında tələbə adını qazanan birinci tədris ili tələbələri üçün unudulmaz və ruhlandırıcı görüş təşkil olunub. Tədbirdə Milli Məclisin deputatı, iqtisad elmləri doktoru, professor Əlibala Məhərrəmzadə iştirak edib.

​Görüşün əvvəlində ADPU-nun Quba filialının direktoru, qabaqcıl təhsil işçisi, fizika elmləri doktoru, professor Yusif Alıyev professor Əlibala Məhərrəmzadəni səmimi qəlbdən salamlayaraq, onun elm, təhsil və ictimai-siyasi sahədəki zəngin fəaliyyətindən, eləcə də filialın inkişafına göstərdiyi diqqətdən danışıb. Professor Yusif Alıyev belə nüfuzlu ziyalıların tələbələrlə bir araya gəlməsinin gənclərin dünyagörüşünün formalaşmasında müstəsna əhəmiyyət daşıdığını vurğulayıb.

​Daha sonra çıxış edən Milli Məclisin deputatı, iqtisad elmləri doktoru, professor Əlibala Məhərrəmzadə tələbələri ali məktəb həyatına qədəm qoymaları münasibətilə təbrik edib, onlara yeni uğurlar arzulayıb. O, qeyd edib ki, müasir dövrdə gənclər üçün yaradılan hərtərəfli şərait və dövlətin təhsilə göstərdiyi diqqət əvəzsiz bir fürsətdir. Millət vəkili vurğulayıb ki, tələbəlik illəri sadəcə auditoriya dərsləri ilə məhdudlaşmamalı, gənclər həm də elmi-tədqiqat işlərinə maraq göstərməli, ictimai həyatda fəal və təşəbbüskar olmalıdırlar.

​Çıxışında ölkəmizin iqtisadi inkişaf strategiyasından, gənclərin intellektual potensialının cəmiyyətin tərəqqisindəki rolundan bəhs edən Millət vəkili Əlibala Məhərrəmzadə gənclərə dəyərli tövsiyələrini verib: “Siz yalnız öz ixtisasınızın peşəkarı olmaqla kifayətlənməməli, daimi olaraq oxumalı, öyrənməli və dünyada baş verən prosesləri təhlil etməyi bacarmalısınız. Azərbaycanın gələcəyi sizin bilik və bacarıqlarınız üzərində qurulacaqdır”.

​Görüş çərçivəsində tələbələrin ali təhsil həyatına ilk addımları, qarşıda duran hədəfləri və gələcək peşə fəaliyyətləri barədə geniş fikir mübadiləsi aparılıb. Gəncləri maraqlandıran sualları cavablandıran Milli Məclisin deputatı, iqtisad elmləri doktoru, professor Əlibala Məhərrəmzadə onlara həyat və təhsil yollarında işıqlı yol göstərib, onları hərtərəfli kadr olmağa səsləyib. Səmimi və interaktiv şəraitdə keçən tədbir gənclərdə böyük coşqu və yüksək əhval-ruhiyyə yaradıb.

Whatsapp
ADPU Quba filialı
ADPU Quba filialı
Salam! sizə necə yardımcı ola bilərik?