Riyaziyyatçının naxışları

Pedaqoji Universitetinin Quba filialında “Riyaziyyatçının naxışları” şüarı altında yubiley mərasimi təşkil olunub

Fizika-riyaziyyat elmləri doktoru, dosent Qasımov Telman Bensər oğlunun 65 illik yubileyi münasibətilə Azərbaycan Dövlət Pedaqoji Universitetinin (ADPU) Quba filialında “Riyaziyyatçının naxışları” şüarı altında yubiley mərasimi keçirilib.
Dövlət Pedaqoji Universitetinin Quba filialının direktoru fizika elmləri doktoru, dosent Yusif Alıyev tədbirin açılışındakı çıxışında yubilyarın məqsədyönlü fəaliyyətini yüksək dəyərləndirib, tanınmış alimə peşəkar pedaqoji fəaliyyətində uğurlar arzu edib. Azərbaycan xalqının yüksək genetik xüsusiyyətlərindən bəhs edən dosent Yusif Alıyev diqqətə çatdırıb ki, Azərbaycan xalqının bütün dövrlərdə dəqiq elmlərə göstərdiyi maraq Telman Qasımov kimi alimlərin yetişməsində mühüm amil olub.
ADPU-nun Quba filialı Riyaziyyat fakültəsinin d.v.m.i.e. Nübar Bayramovanın moderatorluğu ilə keçirilən tədbirdə yubilyarın elm və təhsil sahəsindəki ən yaxın həmkarları, təhsil ocağının professor-müəllim və tələbə heyəti iştirak edib.
Alimin elm və təhsil sahəsindəki nailiyyətlərindən söz açan Nübar Bayramova riyaziyyat elminin həyatımızdakı əhəmiyyəti haqqında, hər bir sahədə həyatımızı daha asan, daha effektiv və daha mənalı edən amil olmasından, məntiqin və düşüncə tərzinin inkişafına böyük töhfə verməsindən danışaraq, Telman Qasımovun bu sahədəki böyük xidmətlərindən bəhs edərək ona ən xoş arzularını və təbriklərini ünvanlayıb.
Riyaziyyat və Mexanika İnstitutunun şöbə müdiri, fizika-riyaziyyat elmləri doktoru, professor Bilal Bilalov, eyni qurumun baş elmi işçisi, ADNSU-nun professor Fərman Məmmədov, Fizika İnstitutunun laboratoriya müdiri, fizika-riyaziyyat elmləri doktoru, professor Zakir Cahangirli, Milli Aviasiya Akademiyasının professor, fizika-riyaziyyat elmləri doktoru, professor Rabil Amanov, riyaziyyat üzrə fəlsəfə doktoru, dosent Telman Qasımov, ADPU-nun Quba filialının Dəqiq və təbiət elmləri kafedrasının müdiri v.m.i.e., riyaziyyat üzrə fəlsəfə doktoru Nurbala Süleymanov çıxışlarında yubilyar haqqında xoş sözlər deyib, alim dostlarına səmimi qəlbdən təbriklərini çatdırıblar.
Tədbir çərçivəsində ADPU-nun Quba filialının istedadlı tələbələrinin ifasında müxtəlif səhnəciklər, viktorina və təbriklər yer alıb.
Dosent Qasımov ADPU-nun Quba filialının “Fəxri Fərman”ı ilə təltif edilib.